ग्राहकांना वीज बिलांचा ‘शॉक’; राज ठाकरेंनी मुख्यमंत्र्यांना दिला ‘हा’ सूचक इशारा

मुंबई: राज्यातील वीज ग्राहकांना अव्वाच्या सव्वा वीज बिल आकारण्यात आले असून त्याची मनसेचे अध्यक्ष राज ठाकरे यांनी गंभीर दखल घेतली आहे. या वीज आकारणीला तात्काळ चाप लावा. महावितरण, बेस्टसह खासगी वीज कंपन्यांना समज द्या, अन्यथा या वीज कंपन्यांना आम्हाला झटका द्यावा लागेल, असं सांगतानाच करोना असला तरी अशा विषयात मनसे गप्प बसेल अशी चुकीची समजूत करून घेऊ नका, असा सूचक इशारा राज ठाकरे यांनी मुख्यमंत्री उद्धव ठाकरे यांना पत्र लिहून दिला आहे.
राज ठाकरे यांनी मुख्यमंत्री उद्धव ठाकरे यांना पत्र लिहून ग्राहकांना आलेल्या अव्वाच्या सव्वा वीज बिलाकडे लक्ष वेधलं आहे. करोनाच्या लढाईत राज्य सरकारचं बहुदा एका महत्त्वाच्या विषयाकडे दुर्लक्ष होतंय किंवा जनतेच्या तीव्र भावना त्यांच्यापर्यंत पोहोचल्या नसाव्यात म्हणून हे पत्र लिहित आहे, अशी पत्राची सुरुवात करून राज यांनी मुख्यमंत्र्यांकडे ग्राहकांच्या समस्यांना वाचा फोडली आहे.

Leave a Reply

Your email address will not be published. Required fields are marked *